Dec 12, 2015

ئێرە “هەرێمە جوانەکە”یە


خالد سلێمان
I



لە ڕاگەیاندنێکدا، بەڕێوەبەرایەتی ڕاگەیاناندنی سلێمانی بۆ سایتی (دواڕۆژ) ئاشکرای دەکات، کە زنیکەی ٨٣ ملیار دینار لای هاووڵاتیان و کۆمپانیا و دام دەزگاکانی حکومەتە. هەڵبەت حکومەت ناتوانێت داوای پارەی کارەبا لە هاووڵاتیان بکات، چونکە :
یەکەم: موچەی فەرمانبەران بە وەرزانە دەدرێت و کارەبا هێشتا مانگانەیە
دوەم: کارەبا بوەتە ئەستێرەی سیوەیل 
سێیەم: ئەگەر ئەو ٨٣ ملیار دینارە بدرێت دەچێتە ناو خەزێنەی حکومەتەوەو بۆ پارێزگاکە بەکار ناهێنرێت

II
هەرێمەکەمان، هێشتا لە چوارچێوەی حکومەتی فێدراڵی عیراقدایە، کەچی چون بۆ بەغدا وەک خیانەتی نیشتمانی تەماشا دەکرێت. لە کاتێکداسوپای تورکیا دێتە ناو قوڵایی خاکی کوردستانەوە، بۆمبارانی لادێکانی دەکات، هاووڵاتیان دەکاتە ئامانج و سەرکردەکانی “وڵاتیش” ڕۆژانە بە ڕێی ئەنکەرەوەن.
III
بەدرێژایی خەباتی سیاسی گەلی کوردستان، مەسەلەی تائیفی و مەزهەبی بەشێک نەبوە لە گوتاری سیاسی و ڕەفتاری ڕۆژانەی، نە خەڵک و نە “مەلەک”، کەچی ئێستا ئەردۆگان و داعش، خەریکن بەئاسانی کورد دەخەنە ناو بەرەکەی خۆیانەوەو دەمانکەنە بەشێک لە ململانێی دێرینی شیعە-سوننە لە ناوچەکەدا.
IV
لە چرکەی دامەزراندنیەوە بزوتنەوەی گۆڕان داوای ڕێفۆرم و سیستماتیزەکردنی دامەزراوەکانی حکومەت دەکات و، مەدەنیبونی بزوتنەوەکەو دوربونی لە چەک و چەکداریی یەکێک بو لە خاڵە بەهێزەکانی، کەچی ئێستا، نەک لە لایەن “حەرەسی قەدیم” وەک دەڵێن، بەڵکو لەلایەن سەرکردە مەدەنیە نوێکانیەوە داوای ئەوە دەکرێت بزوتنەوە “چەکدار” بکرێت.
V
حزبە قەبارە بچوکەکانی وەک شیوعی و سۆسیالیست و بزوتنەوەو زەحمەتکێشان و ئەوانەی ئاشوری و کلدانی و تورکمان ...هتد، لە هیچ مەسەلەیەکی سیاسی، نەتەوەیی، ئەمنی، کۆمەڵایەتی -یا با لە خاتری شیوعی و سۆسیالیست و زەحمەتکێشان بڵێین چینایەتی- پرسیان پێناکرێت، تەنها لەوەدا نەبێت کە دان بنێت سەرۆکی هەرێمدا. ئەمە مۆدێلێکی نوێیە لە سیاسەتداو تەنها حزبی کوردی پەی پیدەبات.
VI
یەکێتی، لەبەر زۆری کەناڵی میدیای بەرپرسەکانی، ناپەرژێتە سەر ڕەوانە کردنی لێدوانە ڕەسمیەکانی، کەچی موچەی راگەیاندنە ناوەندیەکەی لە وەرزەوە بۆ وەرزیش بە باشی نادرێت و بەرپرسەکانیش بەردەوام داوای بڵاوکردنەوەی چالاکیەکانیان لە (ئیعلامی مەرکەزیدا) دەکەن. ئەم یەکێتییە بەشداری حکومەتە، لە خانەقینەوە تا شنگاڵ پێشمەرگەی هەیەو شەهیدێکی زۆری داوەو ژمارەیەکی بەرچاو لە سەرکردە سەربازیەکانی لە بەرەی کەرکوک و موسڵ و جەلەلا شەهید بون، کەچی لە ڕێگەی کەناڵەکانی میدیاوە زانی سوپای تورکیا گەیشتوەتە باشیک لە موسڵ. کۆنگرەو باڵباڵێن، لەولاوە بگرە، باسیان نەکرێت باشترە، با کەس دڵگران نەبێت.
VII
پارتی....زۆری پێخۆشە بووترێت بە بەرنامەوە ئیش دەکات، بە مەرجێک باسی ڕیککەوتن لەگەڵ بەغدا نەکرێت، میوانی کەناڵەکانی ڕاگەیاندنی بیت و قسەی زۆر بە گۆڕان بکەیت، دامەزراندنی دەوڵەتی کوردی زۆر دور نەخەیتەوە، هەزارو یەک “موبەڕیڕ” بۆ هاتنی سوپای تورکیا بۆ ناو خاکی کوردستان بهێنیتەوە، باسی سیستمی پەرلەمانیش بۆ کوردستان نەکرێت، هەر کە باسی موچەی فەرمانبەرانیش هاتە پێشەوە، باسی ئامانجە گەورەکانی نەتەوە بکەیت، توخنی نەوت و دانە گاز هەر نەکەویت.
VIII
میدیا زەبەلاح و “پرۆفیشناڵ”ەکان، بەشداری هەمو شتێک لەم “هەرێمە جوانە”دا دەکەن، بۆنەی کۆمەڵایەتی، بەخشینەوەی چکلێت و شیرینی، کامپین دژی توندوتیژی بەرامبەر ژنان، شای و زەماوەنی شوکردن و ژنهێنان، بەتایبەتیش ژنی دوەم، بەڵام بەشداری ئازادی ڕادەربڕین و دیموکراسی ناکەن.
IX
میدیای ئەهلی ئەوەندە باسی خۆیان کرد، بون بەچاوەوەو لە هەژاریدا بەرەو داخستن دەڕۆن.
X
زۆربەی ڕۆژنامەنوسان، ئەگەر ڕۆژێک بەرپرسەکان نەبینن، بابەتی ئەو ڕۆژەیان کاڵ و کرچ دەردەچێت و زانیارییەک یان ڕایەکی ئەوتۆیان نیە پێشەکشی خەڵکی بکەن.
XI
ئەو هەمو پارەیە بۆ کۆنگرەی نێودەوڵەتی پاریس بۆ ژینگە خەرجکرد، کەچی ڕاپۆرتێکی باشمان نەبینی، بەرنامەی حکومەتمان لەبواری ژینگەدا نەزانی، ئەوەندی سێلفیمان بینی،  ڕاپۆرت و شتی تری تایبەت بە کۆنگرەکەمان نەبینی.
 XII
باسی نەبونی و بێموچەیی ئەوەندە بێتام و بێزارکەر بوە، خاوەنی ڕانج-رۆڤەرو لیگیزز و مارسیدس و  ئۆتۆبێلە گرانبەهاکانی تریش باسی. 
VIII
بزنس-مانی وامان لەم کوردستانەدا هەیە، کارگەیەکی “مواسەفات” بەرزی دۆشاوی تەماتەی کردوەتە کۆگا بۆ دۆشاوی تەماتەی تورکی، چونکە ئەگەر کارگەکە بخاتە ئیشەوە، ئەوە دەبێت، کرێکاری کورد کاری تیادا بکات، تەماتەی کوردستان نەگەنێت وفڕی نەدرێت، شانازی بە دۆشاوی تەماتەی کوردییەوە بکەین، ئۆتۆمبێلی باری تورکی و ئێرانی کەم ببنەوەو گازی دوەم ئۆکسیدی کاربۆن زۆر نەبێت و چەندەها شتی باشی تر. بەڵام هێنانی دۆشاوی تەماتە لە تورکیاوە سەرێشەی ناوێت، کڕین و فرۆشتن و قازانجی : پارەی کاش
VX
لەم هەرێمە جوانەی ئێمەدا، سیاسەت بەپارەی کاش دەکرێت
X
ئەردۆگان کە بەشداری لە کردنەوەی فڕۆکەخانەی نێودەوڵتیدا کرد، زمانی نەیهێنا بڵێت هەرێمی کوردستان و وتی : ئەم هەرێمە جوانە، ئەڵێن ئێستا لەو شوێنەی ناو فڕۆکەخانە ئەم ناوەی بۆ کوردستان هەڵبژارد، لە کاتی باراندا تکە دەکات و وەک خانوی قوڕی کوردەواری سەتڵی بۆ دادەنێن. 

No comments:

Featured Post

ندرة المياه تهدّد الشرق الأوسط.. والعراق على الخط الأحمر

خالد سليمان  يشير مدير المعهد العلمي للبيئة في جامعة جنيف مارتن بينيستون إلى ذوبان شبه كلي لثلوج جبال الألب نهاية القرن الحالي، حيث ...