May 23, 2013

نابێت پرۆژەی دەستوور وەک دەقێکی پیرۆز تەماشا بکرێت

حاکم قادر حەمەجان*

بەپێویستم زانی دەربارەی رەشنوسەكە لەدیدگای خۆمەوە وتەیەك پێشكەش بكەم، دیارە كە دەستوور پەیمانێكی كۆمەڵایەتییە، لەنێوان فەرمانڕەوایەتی و خەڵكدا‌و بەدایكی یاساكانیش دادەنرێت، ئەم بابەتەش نەك تەنیا پەیوەستە بە لایەنەكانی دەسەڵات‌و هێزەكانی ئۆپۆزسیۆنەوە، بەڵكو پرسێكی هێندە چارەنوسسازە كە پەیوەندی بەتاك بەتاكی خەڵكی كوردستانەوە هەیە، واتە موڵكی هەموو كۆمەڵگایە نەك پێكهاتەو هاوپەیمانێتییەكی دیاریكراو. هەربۆیە پێویستە رەشنوسەكە پرۆژەی دەستوورێك بێت بۆ خەڵك و هەڵقوڵاوی تێزە نیشتمانی‌و مەدەنییەكان بێت‌و فەلسەفەی حوكمڕانێتیەكی دیموكرات‌و نیشتمانی دیاری بكات، دەبێت پرۆژەی دەستوورێك بێـت بۆ یەكخستنەوە و یەكڕیزیی و ئاشتكردنەوەی ناوماڵی كوردو هاونیشتمانییەكانی، نەك دوورخستنەوە‌و لێكترازان و ناتەبایی،
ئەمەش هەرگیز ناكاتە ئەوەی پرۆژەكە وەك دەقێكی پیرۆز مامەڵەی لەگەڵ بكرێت‌و وەك خەتی سوور لێی بڕوانرێت‌و رێگا لەبەردەم هەمواركردن‌و دەستكاریكردنیدا دابخرێت. بەڵكو ئەمە پرسێكە هەمیشە قابیلی گەشەپێدان‌و زیاتر كامڵكردنە بۆ خزمەتی زیاتری بەرژەوەندی گەلی كوردستان بەپێی قۆناغ‌و بارودۆخ و گۆڕانكارییەكان.
لەم روانگەیەشەوە ئەنجومەنی سەركردایەتی ی.ن.ك لەدوایەمین كۆبوونەوەیدا داكۆكی لەهەمواركردنەوەی پرۆژەی دەستوور كرد و پەیوەستی كرد بە"سازانی نیشتمانییەوە".
لەسەر هەمان بنەما، پێویست دەكات خەڵك و لایەنە سیاسییەكان و رێكخراوەكانی كۆمەڵگەی مەدەنی و شارەزایانی دەستووری و یاسایی لەبوارەكەدا راوبۆچوونی دروست بۆ خزمەتكردنی خەڵكی كوردستان دەرببڕن بەمەبەستی چاككردنی كەلێن و كەموكورتییەكانی پرۆژەكە تا بوار بۆ بچوكترین بۆشایی‌و كەموكوڕی نەمێنێتەوە.
دەبێت لەبەرچاومان بێت كە یەكڕیزیی گەلی كوردستان بەستراوەتەوە بەشەراكەت و رێزگرتن لە ئیرادەی هەموو لایەك، لایەنە سیاسییەكانیش رێژە و ئەندامیان هەیە لە پەرلەمانی كوردستاندا و مافی خۆیانە قسە و راوبۆچوونیان دەرببڕن و تەرحە دروستەكانیان كە لەبەرژەوەندی گشتی گەلدایە لەبەرچاو بگیرێت.
سەرباری ئەوەش پرۆژەی دەستوور كارێكی سەرەتاییە بۆ بناغەیەكی دەستووریی، تا ئەو كاتەی قۆناغەكانی بەدەستووركردن دەبڕێت، دەكرێ و شیاوە پڕۆژەی دەستوور دەستكاریی و گۆڕانكاریی تێدابكرێت، بەتایبەتی بۆ هەرێمی كوردستان، كە هیچ ئەزموون و مێژوویەكی یاساییمان لەو بارەیەوە نییە، بۆیە پێویستە پێداچوونەوە و لێكۆڵینەوەی وردی لەسەر بكرێت، بەو پێیەی دەستوور بەرژەوەندییەكانی هەرێم و خەڵكی كوردستان دیاریی دەكات بۆ ئێستا و داهاتووش.

دەستووری هەر وڵاتێك كە تەواوكراوە و قۆناغەكانی بڕیووە و پەسەندیش كراوە، دەستكاریكردن و گۆڕانكاریی تێدا (پاش ماوەیەك) كارێكی ئاساییە كەلە پێناوی بەرژەوەندی گشتی گەلدابێت، ئەگەر بۆ دەستوورێكی پەسەند و پیادەكراو پرۆسەی دەستكاری و هەمواركردنی ئاسایی بێت، ئەوا بۆ پرۆژەیەكی دەستووری وەك هەرێم پێویستە بپرسین بۆ نەتوانرێت گۆڕانكاری تێدا بكرێت!.
لەم روانگە و نموونە خێرایانەوە، پێویستە پرۆژەی دەستوور گوزارشت لە ئیرادەی هەموو دانیشتووانی هەرێمی كوردستان بكات، كەس ناتوانێت بە تاكڕەوی بڕیاری لەسەر بدات تا تەوافوقی نیشتمانی لەسەر نەكرێت و هەمووان لەسەری كۆك نەبن ئەگەرنا دەستوورێكی كەموكوڕ و ناتەواو دەردەچێت و ئامانجی خۆی ناپێكێت كە پاراستنی مافی تەواوی پێكهاتە وچین و توێژەكانی گەلە.

* ئەندامی دەستەی کارگێڕیی مەکتەبی سیاسی یەکێتی نیشتیمانی کوردستان
ئەم وتارە لە پەیجی حاکم قادر لەسەر تۆڕی کۆمەڵایەتی فەیسبووک وەرگیراوە

No comments:

Featured Post

ندرة المياه تهدّد الشرق الأوسط.. والعراق على الخط الأحمر

خالد سليمان  يشير مدير المعهد العلمي للبيئة في جامعة جنيف مارتن بينيستون إلى ذوبان شبه كلي لثلوج جبال الألب نهاية القرن الحالي، حيث ...